НОВИ САД/КУЛА – Покраїнски фонд за розвой польопривреди розписал Конкурс за пейц кредитни намени у 2016. року. Реґистровани польопривредни ґаздовства можу конкуровац за средства за набавку новей польопривредней механїзациї, за набавку ройох пчолох, кошнїцох и опреми за пчоларство.
Кредити мож достац и за набавку нових системох и опреми за наводньованє, потим за набавку нових пластенїкох, склєняних заградох и опреми за нїх, та за набавку нових процивкаменцових мрежох у вецейрочних засадох овоци и винїцох у 2016. року.
Кредити буду одобрени з рочну камату од 2 одсто, з применьованьом валутней клавзули. Мож достац кредит од 1 000 до 20 000 еври, а термин одплацованя до пейц роки, з ґрейс периодом од 12 до 24 мешаци.
Потребни формулари ше находза на сайту www.fondpolj.vojvodina.gov.rs а у Кули помоц коло зазберованя документациї и пополньованя формуларох мож достац у Канцелариї за Локално-економски розвой Кула – од пондзелку по пияток од 7 до 15 годзин, лєбо наволац на число 025/729-650 и 025/751-189.