За щесце нє треба вельо

автор маф
1.2k Опатрене

 

 Пензионер Йоаким Дудаш з Руского Керестура и його супруга Веруна винашли способ як виполнїц свой шлєбодни час, а при тим упознац нови места и красни предїли, нових людзох и велї манифестациї. На таки способ, як гваря, обновя дзеку за животом и „наполня батериї”.

 Дудашовим гоби кратки путованя и обиходзеня природних красотох и манифестацийох, ту, нєдалєко по Войводини, або такой за гранїцу у сушедней Горватскей.

 Йоаким по фаху друкар, перши три роки робел у керестурскей друкарнї, а вец прешол до Вербасу дзе остал 31 рок. Док бул заняти часто путовал по цалей тедишнєй Югославиї, и випатра же ше му тото уцагло под скору бо ше остатнї дзешец роки, ниа, до путованьох наисце залюбел. Як гваря його домашнї, то му уж як даяка „хорота”. У тим ше зложели и його велька любов ґу природи и красним предїлом, ґастрономиї и вину, а окреме тамбурашом.

ЗА КРАСНИ УЖИТОК НЄ ТРЕБА ИСЦ ДАЛЄКО

– Шицко тото мож найсц, видзиц и дожиц ту нєдалєко коло нас, а за кратки час. Нє треба анї длуго путовац, анї вельо пенєжи потрошиц. Треба мац авто, добру дзеку и идеї. – Одходзиме даґдзе за викенд, соботу лєбо внєдзелю. Найчастейше мам обичай же внєдзелю рано перше дакус зайдзем до Дому пензионерох, а вец шеднєме до авта, та гайд даґдзе. Скоро вше идземе вєдно зоз супругу, а часто з нами, або син Йоаким, дзивка Меланка, або дахто други з валалу хто заинтересовани – гвари Йоаким.

 Дудашово нащивюю рижни културно-туристични манифестациї и сайми по околїску, та так були на Паличу, у Туриї, Зомборе, Стапару, Бачким Петровцу, Бачким Моноштору, Бачкей Тополї, Новим Садзе, Сримских Карловцох, Ердевику…  Ходза и до сушедней Горватскей, а барз любя пойсц до Ердуту, а зайду и до Илоку, Вуковару и Осєку. Голєм два раз до рока одходза на польопривредни саям.

– Ище док сом бул друкар вельо того ми прешло през руки, та сом надосц дознал о шицким. А тераз, основне пойсц на Саям туризма до Нового Саду, дзе маш базу податкох, шицки датуми манифестацийох. Там зме набавели и окремни календар у хторим вец вибереме цо нас найбаржей интересує и дзе плануєме пойсц. Ґу тому, дзеци понаходза шицко и на интернету дзе єст ище подробнєйши информациї – толкує наш собешеднїк.

Од Йоакима и його дзивки Меланки дознаваме же на таких случованьох  мож вельо того красного видзиц и дожиц. На спомнутих манифестацийох углавним наступаю и вельочислени КУД-а, дзе рижнородносц и нацийох у Войводини, и облєчива и обичайох, та шицко друге.

– Найвецей културни дружтва зме видзели у Бачким Петровцу на їх Дньох словацкей култури, а поодобнє вшадзи, та и на манифестацийох у Горватскей. А окремни Карловци. Там мож шицко видзиц, од културних знаменїтосцох як цо Патрияршия, Ґимназия, та и пиньвица з одличним вином хторе мож покоштовац. Барз интересантни и Днї ґуґлофа, а най нє бешедуєм о чардох на Дунаю, або на Паличу, дзе тиж єст  винариї, окреме тота цо ю ма Звонко Боґдан. А кед ше рушиш до Зомбора у децембру на  Фестивал „Раванґрад” дзе промоция вина, єдлох, тамбураше, чарди и салаши, а вец ручни роботи женских здруженьох… Подобни и фестивал Бодроґ-фест у Бачким Моноштору – одушевено приповеда Йоаким.

22 Dudas zoz sunkami

СЛОВАЦИ, А ПОГОТОВ СРИМЦИ, ЗНАЮ ГОСЦОХ ПРИВИТАЦ

Дудашово зоз своїх путованьох, нащивох, и стретнуцох з людзми, приноша красни упечатки. Гваря же окреме госцолюбиви и отворени Словаци, а як обще познате, найбаржей Сримци.

– Словаци наисце госцолюбиви и з нїма ше лєгко позгваряме кажде на своїм язику. Маме вельо дожица, а окреме паметам зоз Ердевику при Бачкей Паланки дзе вони познати по своїм кулену и колбасох. Раз так ми єден понука коштовац колбасу и гвари же є барз добра, а нє горка, бо я нє любим горке, та ше вигварям. Но мушел сом покоштовац, „порумеґал” сом, а кед сом лїґнул, мал сом досц, нє мог сом анї слово прегвариц. Лєм сом одбегнул до кафичу и нє мог ше води огациц, таке ми горке було – памета Дудашов, и предлужує же сримску госцолюбивосц, гоч су хторей нациї,  його фамелия нє раз дожила.

– Там ше нє заквач з бешеду, бо ши готови, нє можеш ше „одняц”. Раз так у Ердевику, охабел сом авто опрез єдного обисца. Першираз ме чловек видзел, пофрантовали зме дакус у бешеди, и такой нас поволал на їх викендицу.

ЗА ДЗЕНЬ ПОСТАРЧЕЛ НА ШТИРИ МЕСТА

– Интересантне же оцец єдней нєдзелї постарчел на штири места походзиц. Дополадня у Тополї бул вашар, на поладнє уж мушел сцигнуц до Вербасу на Кирбай, отамаль бежал до Керестура на „Днї паприґи”, а вец беж, бо супруги обецал же ю за родзени дзень одведзе до Вуковару на концерт „Славонских лолох”, дзе була и манифестация ручних роботох – з ошмихом толкує Мелания.

– Гей, там зме до конца витримали, а я ше вец „хвалїм” же моєй аж з Горватскей квеца приношим – з ошмихом доклада Йоаким.

КЕД СПОМНЄШ КЕРЕСТУР…

Як нам приповедаю Дудашово, Йоаким и їх дзивка Мелания, на своїх путованьох и манифестацийох упознали велїх людзох и здобули нови познанства. Мило им и кед чую красни думаня других о Керестуре. Источашнє, и вони промовую свой валал вшадзи дзе пойду.

– Нїґда нє мож знац кого можеш стретнуц. Так у Ердуту на „Дньох черешньох” стретли зме Лїкарових з Миклошевцох, и барз зме ше им зрадовали. Або, на фестивалу у Бачким Петровцу,  кед зме стретли министра вонкашнїх дїлох Словацкей, Мирослава Лайчака, котри Русин. Пришол зоз супругу, а були там з нашима министрами. Озвали зме ше ґу ньому по руски, та боме застанул, та ше и вон ше ґу нам накратко озвал. То наисце мили дожица – памета Мелания.

Як гваря, окреме им мило кед дожию же людзе у других местох знаю за Керестур и його жительох по дачим красним, и ту по Войводини и у Горватскей. А найволя пойсц до Ердуту дзе нащивюю и даскельо їх манифестациї як цо Саям квеца, Днї черешнї, а вше зайду и до їх винариї.

– Там у винариї найвекши на швеце активни „гордовчок”, 75 000 литри, з руку виробени, а на задку виґравирани мотиви з „Тайней вечери”. Кед зме поведли же зме пришли з Керестура, чловек ше зрадовал, бо часто приходзи до нашого краю. Влонї на „Дньох квеца” зме нє знали дзе стануц з автом, та зме ше озвали, а єден чловек ше одушевел же нас стретнул, бо ше здогаднул же як млади до Керестура ходзел куповац статок. Мушели зме остац на котлїку, на полудзенку… Дзе ґод ше обрациш, кед спомнєш Керестур, людзе маю красне думанє о нїм – поцешени Дудашово. Вони своєродни маркетинґ за свой валал и дзе ґод пойду ноша нотеси и пенкала з надписом Руского Керестура, та промовую и манифестацию „Днї паприґи”.

– Шицки знаю за Керестур по „Червеней ружи”, а ми вец представиме и нашу нову манифестацию и воламе людзох. И велї уж були на „Дньох паприґи” – толкує Мелания.

– Покля можем ходзим вшадзи, и сцем повесц же най идзе хто ґод лєм може дацо видзиц дацо, бо ше каждому зда гоч яка пременка. Нє  важне кельо, чи годзину, два, або три, алє чловек ше ошвижи. Видзе з дому, „витаргнє” ше зоз каждодньовосци, а то вше добре и за психичне,  за физичне здравє. За мало пенєжи чловек може вельо того достац.

22 Dudasovo

УЖИВАЮ У КРАСНЕЙ ПРИРОДИ

Бачи Йоаким и шицки Дудашово барз любя природу, та им нє чежко „одбегнуц” на Дунай до Боґоєва. Пообиходзели и шицки чарди на тей прекрасней рики, од Бездану по Сримски Карловци. Най нє споминаме Фрушку гору. А, гваря же єст и други красни места.

– На пол годзини од Керестура оддалєна Кривая при Бачкей Тополї дзе прекрасни парк и нєпреповедзена цихосц цо „душу дава”, або лєс на Панониї. Прекрасне озеро и коло Ердевику дзе єст и лебеди. Кед дараз нє маме дзе пойсц, набереме надосц хлєба и кукурици та, гайд до Сриму, на озеро кармиц лебеди. Нєвироятне дожице кед  нам цала фамелия лебедох є з рукох – одушевени Дудашово.

ПОВЯЗАНИ ТЕКСТИ