БЕОҐРАД – Вчера у Сербиї и у велїх европских державох у хторих под час Другей шветовей войни живот страцели 53 милиони людзе, означени Медзинародни дзень здогадованя на жертви голокаусту. У Беоґрадзе почитованє жертвом указане з кладзеньом венцох на Памятнїк жертвох ґеноциду у Другей шветовей войни.
Дзень здогадованя на жертви голокаусту означує ше 27. януара, на дзень кед єдинки Совєтскей армиї 1945. року ошлєбодзели найвекши концентрацийни лоґор Аушвиц у Польскей, а при ошлєбодзованю у нїм були лєм 7 500 особи.
Церемонию у Беоґрадзе предводзел предсидатель Сербиї Томислав Николич, а присуствовали и министер одбрани Братислав Ґашич, подпредсидатель Народней скупштини Веролюб Арсич, городоначалнїк Беоґраду Синиша Мали, та представителє єврейскей и ромскей заєднїци.
З тей нагоди предсидатель Николич гварел же Сербия нїґда нє забудзе злодїйства над своїм, алє и другима народами и же од нас завиши чи нашо дзеци вицагню поуку з тих часох. Огляднул ше и на актуални нємири у Европи и ширенє екстрмизму хтори, як гварел, опомина каждого же би ше здогаднул страданьох под час Другей шветовей войни.
На церемониї у Аушвицу з нагоди означованя Медзинародного дня здогадованя на жертви голокаусту присуствовала и делеґация Сербиї, на чолє з министром Александром Вулином.