ҐОСПОДЇНЦИ – З нагоди прешлорочней ювилейней, дзешатей Колониї подобових уметнїкох „Стретнуце у Боднарова”, як и означованя 110-рочнїци народзеня Стевана Боднарова, остатнї дзень отримованя Колониї, внєдзелю, 26. юлия, представена и Подобова моноґрафия „Стретнуце у Боднарова 2005-2014”.
На промоциї кнїжки, у хторей з кратшу биоґрафию и фотоґрафию єденого малюнку представени кажди уметнїк котри участвовал на даєдней з дзешец Колонийох, спред видавателя – Дружтва за руски язик, литературу и културу, бешедовала Ирина Папуґа, та рецензентки кнїжки Ирина Гарди Ковачевич и мр Миомира Блаґоєвич.
Пред представяньом Моноґрафиї, свою першу кнїжку писньох „Кед забудзем” представел млади поета зоз Жаблю Марко Билич.
Колония подобових уметнїкох „Стретнуце у Боднарова” вчера пополадню закончена з додзельованьом подзекованьох учашнїком. Наймладшим учашнїком, фамелия писателя Штефана Гудака подаровала и по єдну його кнїжку за дзеци „Кудлик пудлик”, а орґанизаторе прибор за рисованє.
Колонию орґанизовало Дружтво за руски язик, литературу и културу, у сотруднїцтве з ОШ „Жарко Зренянин” у Ґосподїнцох, численима спонзорами, здруженями и поєдинцами, як и з потримовку Општини Жабель и Националного совиту Руснацох.
