НОВИ САД – У Новим Садзе тирва петнасти Еґзит фестивал, и за два днї привитал шветово гвизди и вельке число нащивительох на Петроварадинскей твердинї. На отвераню, штварток, 9. юлия, на Главней бини наступел бенд „Clean Bandit”, а атмосферу найбаржей подзвигла шпивачка з Велькей Британиї Емели Санде. На Денс арени наступели Адам Беєрн, док на Фюжн бини то була ґрупа „Партибрейкерси”.
Окрем виводзачох, отверанє фестивалу означел и традицийни вельки и розкошни огньомет, хтори зоз своїма ефектами, алє и з тирваньом, одушевел вельочислену публику.
Вчера, други дзень Фестивалу, наступела позната ґрупа „Motorhead”, а такой после нїх и шпивач цалком другого жанру – Том Одел. У Денс арени наступал Hardwell – ди джей преглашени за єдного з найлєпших на швеце у своїм фаху, а на Фюжн бини то були репер Марчело и Eyesburn.
Орґанизаторе найвецей нащивительох обчекую нєшка, док на Главней бини наступи Ману Чао и Джон Нюмен. На Денс арени наявени Мартин Гарикс (на два годзин вноци), а на Фюжн бини наступя Feud и Канда Коджа и Небойша. На ютре наявени наступи Capital Cities и Faithless.
Цена єднодньових уходнїцох за нєшка 3 790, а за ютре 3 000 динари.