ШИД – Вчера, 13. децембра, у Руским доме у Шидзе отримани Рочни концерт Културно-просвитного дружтва (КПД) „Дюра Киш,” а источашнє означени и два ювилеї – 95-рочнїца роботи спомнутого дружтва и 20 роки од вибудови нового Руского дому.
У Шидзе 1920. року з роботу почала Руска читальня, хтора потим преросла до дружтва. У часох по Другей шветовей войни дружтво робело як Руска матка, а од 1952. року и нєшка ноши мено партизанского борца Дюру Киша.
У програми Рочно концерту участвовали наймладши танєчнїки Дружтва, потим Младша и Старша шпивацка ґрупа, оркестер Дружтва и солисти, хтори виведли руски танци, музику, шпиванки, алє и стихи Михала Ковача.
З тей шветочней нагоди госци Шидянох були члени КУД „Яким Гарди” з Петровцох, з Горватскей, хтори ше представели з венчиком танцох, а наступела и Хлопска шпивацка ґрупа спомнутого дружтва.
Як госци на Рочним концерту участвовла и Шпивацка ґрупа КПД „Иван Котляревски” з Бикичу.
По двогодзиновей програми, учашнїки на концу одшпивали „На многая лїта”.
Медзи визначнима госцами на Концерту були предсидателька Скупштини општини Шид Наташа Цвєткович, помоцнїца предсидателя Општини Шид задлужена за социялни питаня Биляна Крч, началнїк Општинскей управи Шид Ромко Папуґа, члени Националного совиту Руснацох зоз Шиду, дзепоєдни члени Општинскей ради и одборнїкї у СО Шид, нашо священїки о. Михайло Режак и о. Владимир Еделински Миколка, представителє КУД-ох зоз Шиду и околїска и други.
