КОЦУР – Коцурска Основна школа „Братство єдинство” вчера була домашнї Седмому Медзиокружному змаганю у знаню руского язика, хторе орґанизовало Министерство просвити и технолоґийного розвою Влади Републики Сербиї и Дружтво за руски язик, литературу и културу. Змаганє отриманє за школярох котри поряднє виучую руски язик, як и за школярох котрим руски язик виборни предмет.
Тести, хтори за порядну наставу зложел проф. др Юлиян Рамач, а за виборну Мелания Сабадош, ришовали 68 школяре – 41 з порядней и 27 з виборней настави. Участвовали школяре з 20 школох у 14 местох зоз Сивернобачкого, Заходнобачкого, Южнобачкого и Сримского округу.
Школяре од пиятей по осму класу з порядней настави руского язика були подзелєни до штирох ґрупох, а найуспишнєйши у катеґориї школярох з осмей класи були Терезка Будински з Руского Керестура и Мария Барна з Дюрдьова, котри освоєли перше место.
У катеґориї седмих класох перше место освоєли Соня Балїцки з Руского Керестура и Лидия Чапко з Дюрдьова, а у катеґориї шестей и пиятей класи школяре були лєм похвалєни, понеже нє мали достаточне число бодох за награди.
У катеґориї виборней настави, у конкуренциї школярох з осмей класи перши места освоєли Яна Бодвански, Ана Петкович и Лара Петкович з Нового Саду и Дина Мудрох зоз Сримскей Каменїци.
У конкуренциї школярох зоз седмей класи найлєпша була Марина Грубеня з Нового Саду, у конкуренциї школярох зоз шестей класи перша була Анастасия Джуджар з Кули, а з пиятей Михаило Пап з Нового Саду.
Наградзени школяре достали виданя Новинско-видавательней установи „Руске слово” и Дружтва за руски язик, литературу и културу, як и дипломи, а кажди учашнїк достал припознанє.
Побиднїки у катеґориї седмих и осмих класох пласовали ше на Републичне змаганє, хторе будзе 28. мая, тиж у Коцуре.