КУЛА – Здруженє женох „Идея” з Кули того тижня почало обучованє женох за тканє на кроснох, а у рамикох проєкту „Стари ремесла у нашим краю”.
Обука почала стреду, 14. октобра, отримує ше ю у просторийох Руского КУД „Др Гавриїл Костельник” у Кули, а коло 10 заинтересовани жени за тканє од стреди каждодньово обучує членїца „Идеї” Павлина Такач.
Здруженє женох „Идея” за спомнути проєкт од Покраїнского секретарияту за привреду, обезпечованє роботи и ровноправносц полох, на основи конкурованя, достало 70 000 динари и векшина похаснована за купованє кроснох до Здруженя.
Перша часц обуки будзе закончена на ютре, 17. октобра, а будзе предлужена концом того мешаца, дознава Рутенпрес од члена „Идеї” Янка Такача.
