РУСКИ КЕРЕСТУР – У рускокерестурским Оддзелєню Школи за основне музичне образованє (ШОМО) з Кули 7. новембра поставена интерактивна табла, хтору ше насампредз будзе хасновац у настави солфедя.
Интерактивна табла найновшей ґенерациї набавена дзекуюци средством з Покраїнского секретарияту за образованє, предписаня, управу и национални меншини-заєднїци, як и з донацийох родичох школярох – дознава Рутенпрес од директорки ШОМО Лїляни Барна Никитович.
Нова табла оможлїви школяром иновативни и модерни воспитно-образовни процес, а таки табли уж маю у шедзиску Школи у Кули, тиж за наставу солфедя и теорию музики.