БЕОҐРАД – Вакцина найєдноставнєйши и найефикаснєйши способ за охрану дзецох од оберацих хоротох, а лїкарски фах муши правилно информовац родичох о значеню вакцинованя, заключене на схадзки Одбору за здравство Скупштини Сербиї, хтора отримана пияток, 23. януара.
Остатнї час на дружтвених мрежох мож читац тексти, преважно на нєфахових сайтох, у хторих ше пробує прешвечиц родичох и ширшу явносц же вакцини у себе маю чкодлїви состойки хтори можу виволац неґативни пошлїдки, та на тот способ ширя панїку.
Инфектолоґ Миомир Пелемиш гварел же нєт лїка на швеце хтори нє ма нєжадане дїйство, алє то менше у одношеню на їх позитивне дїйство.
Без огляду на тото, з вакцинацию облапени 90 одсто дзеци, а циль звекшованє того числа, гварел директор Институту за явне здравє „Др Милан Йованович Батут“ Драґан Илич и додал же фах затаєл прето же родичом треба указац на значенє вакцинованя, а нє же би ше вони о тим информовали прейґ дружтвених мрежох.