НОВИ САД – Конкурс за додзельованє безповратних средствох за купованє хижох на валалє тирва по штредок януара, а резултати буду обявени у маю, виявела за РТВ директорка Заводу за ровноправносц полох Весна Шиячки.
Малженски пари, алє и нє повинчани пари, од новембра могли конкуровац за доставанє безповратних средствох за купованє хижох у войводянских валалох. Директорка Шиячки гварела же интересованє за конкурс вельке, а за купованє хижох на валалє ше єднак интересую и млади з валалох и з городох.
Окрем оживйованя войводянских валалох, їх розвой, та мотивованя младих же би ше врацели на валал, єден з важнєйших цильох конкурсу и же би жени були совласнїци хижох, та з тим и економски моцнєйши.
Покраїна и нарок будзе орґанизовац подобни конкрус понеже, як гварела Весна Шиячки, з покраїнским буджетом за 2015. рок тиж предвидзени средства младим паром за за купованє хижох на валалє.