НОВИ САД – На Новосадским сайме, у Конґресним центре „Мастер”, помоцнїк министра просвити мр Любиша Антониєвич вчера отворел 11. Медзинародни саям образованя „Драгокази”, хтори тирва ище нєшка.
На Сайме свойо змисти и напрями представяю и промовую державни школи и приватни универзитети, факултети, штреднї и основни школи, академиї, народни универзитети, школи странских язикох, школи рахункарох и други образовни институциї, а же школяре основних и штреднїх школох ше можу упознац з можлївосцами за дальше школованє.
Представени и активносци студентских здруженьох, информативних центрох, младежских задруґох, аґенцийох за обуку и образованє занятих, видавательних центрох и заводох.
Нєшка, 27. Фебруара, у Сали 4, од 10 до 15 годзин будзе отримане збуванє з назву „Проєкти у образовно-воспитних установох – виволаня и можлївосци”, хторе орґанизує Покраїнски секретарият за образованє, предписаня, управу и национални меншини-национални заєднїци.
Саям орґанизовани з помоцу Менистерства просвити, науки и технолоґийного розвою, спомнутого Покраїнского секретарияту, Управи за образованє Нового Саду и Новосадского универзитету.