ЗОМБОР – На поволанку предсидателя Реґионалней привредней комори Зомбор Зорана Булатовича, представителє Здруженя паприґарох з Руского Керестура вчера присуствовали на округлим столє о сотруднїцтве Заходнобачкого округу и Републики Словениї.
Представителє рижних подприємствох и орґанизацийох з местох штирох општинох Заходнобачкого округу (Зомбор, Кула, Оджак и Апатин), представительом Амбасади Словениї, Словенского Дїловного клубу и привреднїком з тей жеми винєсли можлївосци медзисобного сотруднїцта на привредним планє.
Члени Управного одбору Здруженя паприґаропх – Душица Орос, Весна Гарди и Михал Чижмар на сходзе представели продукцию паприґи у Керестуре и винєсли можлївосц єй предаваня и до Словениї, за цо им, як гварели, потребне витвориц одредзени контакти. Тиж так, привреднїкох зоз Словениї поволали и на манифестацию Днї керестурскей паприґи у Керестуре.