Керестурски Хор шпива гимну Сербиї на конститутивней схадзки Народней скупштини

автор зам;фото:апм
1.2k Опатрене

РУСКИ КЕРЕСТУР/БЕОҐРАД – З Оддзелєня за роботи протоколу, едукацию и презентованє скупштинского скарбу Народней скупштини Републики Сербиї штварток, 26. мая, до Руского Керестура сцигла и службена поволанка же би Мишани хор Дому култури Руски Керестур и Катедралней церкви св. о. Миколая шпивал гимну Сербиї на початку першей схадзки Народней скупштини у новим зволаню, хтора будзе у першим тижню юния.

Предкладанє же би Хор з Руского Керестура шпивал на першей, конститутивней схадзки Народней скупштини дала народна посланїца Олена Папуґа, а з тоту поволанку-согласносцу є и прилапене.

Будзе то други раз же єден наш хор шпива у Народней скупштини, понеже у децембру 2014. року там гимну шпивал и Мишани хор „Гармония” з Нового Саду. З тим и керестурски хор достал вельку чесц шпивац державну гимну пред народнима посланїками, алє и найвисшима функционерами Сербиї, представителями амабасадох у Сербиї и другима визначнима госцами на конститутивней схадзки Скупштини.

Як пише у поволанки зоз спомнутого оддзелєня, хтору Рутенпресу прешлїдзела народна посланїца Олена Папуґа, у Народней скупштини пракса же гимну Сербиї шпиваю визначни хори, хторим то ище єдно припознанє за успишну и вредну роботу. Медзи другима, дотераз госци у Народней скупштини були хори Ансамблу „Коло”, АКУД „Абрашевич” з Беоґраду, АКУД „Иво лола Рибар”, „Барили” з Пожаревцу, „Обилич”, АКУД „Крсманац”, „Святи Йован Креститель” з Бачкей Паланки и други.

Терашнї Мишани хор Дому култури Руски Керестур и Катедралней церкви св. о. Миколая предлужує длугорочну традицию хорского шпиваня у Руским Керестуре, понеже 2014. року означена и 120-рочнїца снованя першого хору.

ПОВЯЗАНИ ТЕКСТИ