Фодбалере керестурского „Русина” ище раз достали пенєжну помоц од наших людзох з Канади, тераз од тих котри жию у Кичинеру и Торонту. Перша така помоц за оправянє просторийох Клубу на Ярашу сцигла прешлого року од Руснацох з Норт Бетлефорду. Гоч зме просторно єдни од других далєко, и надалєй зме, заш лєм, блїзки и свой на свойого нє забува, окреме кед треба помогнуц.
Просториї Фодбалского клубу „Русин” з Руского Керестура на Ярашу, котри пред трома роками означел уж 90-рочнїцу постояня, по даяких спознаньох збудовани початком шейдзешатих, а добудовани початком осемдзешатих рокох прешлого вику. У хижи коло фодбалского стадиону змесцена канцелария, клубски заєднїцки просториї, два зоблєкальнї за фодбалски екипи з купалнями, єдна простория за судийох, економат, та помоцна простория. Управа Клубу их отримовала и отримує кельо може, бо окремни пенєж за тоту намену нє маю, а час роби свойо, та потребне значнєйше оправянє. И то праве дзекуюци добродзечнєй пенєжней помоци од Руснацох котри жию у Канади – у Норт Белтлефорду, Кичинеру и Торонту, а сама робота з найвекшей часци будзе поробена на добродзечней основи, понеже медзи „Русиновцами” єст и рижних майстрох.
ИНИЦИЯТИВА ФОДБАЛЕРОХ
На идею же би ше питало пенєжну помоц за оправянє просторийох прешлого року пришли сами фодбалере и особи з управи Клубу под час пребуваня даскелїх младих бувших Керестурцох зоз сиверней часци Канади у Керестуре, и потримали их – на єдним своїм друженю, на Балу под масками позно вєшенї назберали 630 долари, хтори до конца прешлого рока и сцигли до Керестура.
Тото зазначел и наш Рутенпрес, та накадзи о тим дознал, дакедишнї „Рускословец”, а уж длугши час Канадян – Гавриїл Колєсар, медзи нашима людзми котри жию у Кичинеру и Торонту порушал ширшу акцию же би ше и вони уключели до помоци керестурскому фодбалскому клубу. Гавриїл поволанку за помоц електронски порозпосилал на вецей адреси Руснацох у Канади, подкрипену аж и з рижнима обсяжнима историйнима фактами и податками о снованю и сновательох „Русина” (цо послал и до Керестура), а контакт-особа за зберанє прилогох бул дакедишнї фодбалер „Русина”, тиж дакедишнї Керестурец котри у Канади – Дюра Фекете. Праве прешлого тижня Фекете своїм бувшим колеґом принєсол красни дарунок од наших з Канади – 830 долари, хтори буду похасновани за потребни роботи на реновираня просторийох.
– Главни инициятор тей акциї Гавриїл Колєсар, бул наисце витирвали у тим, по електронскей пошти на велї адреси порозпосилал поволанку за помоц, позазберовал рижни историйни податки о „Русину”, а я бул тот котри зберал прилоги и людзе ми их приношели дому. Нє було им чежко принєсц до обисца, о тим ше подознавали и єден од другого, а на тот завод ше векшином одозвали людзе котри дакеди, на даяки способ були вязани за Русин – чи сами були активни спортисти, чи їх фамелиї. Єст людзох котри сцу помогнуц, думам же их будзе и надалєй, а рахуєм же одредзену часц пенєжу назбераме и на Балу хтори ма буц отримани тераз, 2. априла. Бо, таки акциї нам найвигоднєйше запровадзовац на дзепоєдних наших векших сходзеньох, так же и тота терашаня, кед дарователє мушели приходзиц до мойого обисца, з тим вецей була успишна – гвари Дюра Фекете, котри и сам бул фодбалер „Русина” 18 роки, од 1966. по 1984. рок, у теди успишней ґенерациї котра седемдзешатих рокох єден час бавела и у Бачкей лиґи. Фекете у Канади од 2008. року и тераз як пензионер, зоз свою супругу Йозефину, пришол дакус на длужей до валалу, а на єшень планую присц заш.
– Мушим повесц же ми, окреме тоти дакус старши, обовязно читаме „Руске слово”, провадзиме нашо ТВ и радио-емисиї, аж присутне таке думанє же дакеди знаме вецей цо ше ту збува од вас самих. Шицко то дзекуюци нєшкайшим сучасним системом комуникациї, та ше часто дописуєме по интернету, видзиме и бешедуєме з нашима прейґ скайпу, а досц ше часто и приходзи до старого краю – гвари Дюра, котрого ди-
ректор ФК „Русин” Александар Кочиш, тренер фодбалерох Златко Саянкович, та тренер и спортски роботнїк Борис Шайтош початком того тижня и детальнєйше упознали з планованима роботами реновираня просторийох.
– Прейґ Дюру шицким нашим людзом добрей дзеки котри нам помогли, у мено фодбалерох и управи, посиламе єдно вельке подзекованє, понеже нам їх помоц наисце барз значи, а за тоту намену затераз и єдина. „Русин” достава средства за порядну роботу од Општини Кула, Месней заєднїци, фунционованє Клубу помагаю и даскельо керестурски привреднїки, алє за тото оправянє и отримованє простору нє маме окремни средства – гварели Кочиш и Шайтош.
ПОТРЕБНЕ ВЕЛЬО ПОРОБИЦ
Як зме од нїх дознали, плановане детально пооправяц зоблєкальнї з купальнями и шицки други потребни санитарни роботи, як и у просториї за судийох, положиц нови бойлер, туши, двої ПВЦ дзвери (хтори уж и купени), фоґаши за шмати, лавки за шедзенє доокола, обновиц цегелки на мурох и шицко потим обилїц.
– Увидзиме кельо зме годни поробиц з того цо зме достали як помоц, а чи шицко з планованого будзе и поробене, завиши од средствох, насампредз од добродзечних прилогох – гварел Шайтош. Додаваме же тота акция тирва и надалєй и можу ше уключиц шицки котри сцу помогнуц, як у нашей жеми, так и у иножемстве.
– Вшелїяк же и ми у Канади до нєй будземе уключени и надалєй, рахуєм же одредзени прилоги назбераме и на наиходзацим балє у Кичинеру, покля я у Керестуре, нашо людзе у Канади прилог можу однєсц моєй дзивки, а можебуц би було добре кед би ФК отворел и даяки наменски рахунок, дзе би заинтересовани могли уплацовац средства потребни за оправянє просторийох – гварел на концу тей розгварки Дюра Фекете.
