ШИД – У порти Лєтней владическей резиденциї на нєдзелю, 16. авґуста на 17:00 годзин, почнє перши „Преображеньски базар”, хтори будзе гуманитарного характеру.
На штандох, свойо продукти виложа продукователє квеца, сокох, вина, палєнки, меду, олєю, маджуну, ручних роботох, малюнкох и прикраскох зоз Шиду и околїска.
Добродзечни прилоги викладачох и нащивительох хтори ше назбера на базаре буду мац гуманитарни характер.
Под час базару на видео биму будзе ше приказовац фотоґрафиї такволаней вашарскей часци Кирбаю (ринґишпили, бависка, колїмбачки и друге) з прешлих рокох кед ше вашарска часц находзела опрез будинка резиденциї у Улїци Дюри Киша, як и на Улїци цара Лазара, а хтора з одлуку локалней власци од прешлого року премесцена на пажицу прейґ потоку.
Орґанизатор базару парохия Преображеня Господнього з потримовку Културно просвитного дружтва „Дюра Киш”.