НОВИ САД – Покраїнски секретарият за спорт и младеж стреду, 21. януара, розписал конкурс з обласци спорту, чий циль промовованє спорту и мотивованє гражданох же би були физично активни и водзели здрави живот. Конкурс, за хтори опредзелєни вецей як 3 милиони динари, будзе отворени цали рок, а приявиц ше можу школи и спортски орґанизациї з АП Войводини.
– Школи нам и того року буду главни партнере, прето же прейґ нїх мож облапиц найвекше число дзецох и младих, маю найлєпши материялни ресурси и кадри. Окрем же можу апликовац за опрему и отримованє физкултурних салох, школи нам годни понукнуц и програми з хторима мож унапредзиц звонканаставне понукнуце спорту – гварела Покраїнска секретарка за спорт и младеж Мариника Тепич.
Окрем того, у 2015. року буду розписани ище дзевец конкурси – медзи першима цалорочни конкурс за младеж, потим за означованє спортских ювилейох, орґанизованє медзинародних спортских збуваньох, конкурс за афирмованє женох у спорту, та за едукованє о репродуктивним здравю.
Тиж так, плановане и витворйованє програмох „Активни лєтнї розпуст” и „Активни жимски розпуст”, за дзеци котри нє маю можлївосци одпутовац под час лєтнїх и жимских одпочивкох, наявела Тепичова.
Того року першираз будзе розписани конкурс за опрему орґанизацийох и установох чийо актере, або хаснователє млади, а пенєж можу обчековац и менши штредки за „оживйованє” домох култури. Остатнї конкурс будзе розписани у септембру, а у фокусу будзе борба процив дискриминациї, парняцкого насилства, та насилства прейґ интернету.