Кукурица у Коцуре того року доброго квалитету, урожаї и до 20 одсто векши як влонї, алє октоберска цена од 14 динари парастом нє одвитовала, та ше як и звичайно, одлучовали зохабиц ю у чардаку през жиму.
Хто ше одлучел за предаванє, лупану кукурицу у валалє могол предац до коцурскей роботней єдинки подприємства „Либела продукт”, як и до маґацину подприємства „МК Комерц” (донєдавна „Фарм кооп”).
Же би ше нє одбивало на сушенє, предата кукурица нє шме мац вецей як 14 одсто влаги, гоч пре части дижджи у ламачки, парасти часто принєшу кукурицу зоз вельо векшу влагу од допущеней, та ше вец зочую зоз ище меншу цену од першобутно понукнутей, дознаваме на одкупних местох.
Кукурицу у зарну ше нє муши такой предац и велї ю лаґерую на одкупних местох. „Либела продукт” понукала лаґерованє по цени 1 одсто мешачно од вредносци роби по май идуцого року, а у „МК Комерцу” лаґерую тиж так по цени од 1 одсто мешачно.
Зберанє заостатей кукурици по уж виламаних парцелох постало вше частейши звичай у хотаре, а хто упарти, з цудзу позаохабяну кукурицу може напольнїц и чардак.
Же би ше кукурицу лєгчейше позберало, сцернянку ше часто запалї, и прето ше валалчанє того року окреме стретаю зоз проблемом згореней кукурици, понеже пре витор, огень прейдзе на ище нє виламани кукурици.
Таке ше може случиц и при зугорйованю сцернянки, кед намира цалком иншака. Вшелїяк, анї перша анї друга опция палєня сцернянки нє допущени, а огньогасци од початку ламачки уж вецей раз интервеновали кед горела кукурица.
– Векши чутки поопадовали, а менши пооставали на стеблох. Тераз мушим виламац тото цо мож, а гевто мушим присц позберац цо скорей, бо сом уж обачел же у полю єст громадки, як кед би ю себе дахто рихтал позберац. Одкеди горело, на польо ходзим кажди дзень, же бим ше прешвечел же кукурица ище ту. Нажаль, таку нагорену ю у валалє нє сцу одкупиц, мушим ю вожиц индзей – гварел параст Янко Буила.
На концу, найвецей кукурици останє по обисцох у чардакох, а у кампанї, вшадзи по валалє могло чуц лопот елеваторох, при змесцованю кукурици до чардаку. Вона там прежимує, з наздаваньом же буду лєпши условия зоз першима знаками яри.