ПРЕШОВ (СЛОВАЦКА) – Син нєдавно упокоєного познатого фолклористи у Словацкей Яна Лазорика, Благослав, штредком октобра у Театру Александра Духновича у Прешове нашому режисерови Владимирови Надьови Ачимови придал 18 збирки з фолклорним скарбом, хтори Лазорик подаровал нашому националному театру.
Ян Лазорик бул упознати же по його творох, односно скарбу хтори зазберовал у шаришским краю, Руски народни театер „Петро Ризнич Дядя” (РНТ) у сезони 2014/15. року на сцену поставел представу о свадзебних звичайох „Береме ше, так нам и треба”, у копродукциї з коцурску КУД „Жатва”, цо му було барз мило, а интересантне же РНТ бул остатнї ансамбл хтори за живота Лазорика инсценовал єдно його дїло.
Як Владимир Надь Ачим дознал од сина Лазорика Благослава з Прешова, його оцец з тестаментом одредзел же би по його шмерци 18 збирки з позбераним фолклорним скарбом припадли нашому Рускому народному театру.
У подарованим материялу инсценациї рижних народних обичайох, приповедкох, нотни записи шпиванкох, танцох и друге, богато илустровани, цо будзе на хасен и у роботи РНТ и нашим КУД-ом при обрабяню и поставяню народних звичайох на сцену.
Благослав Лазорик тот оцов леґат Надьови придал под час його режисерскей роботи у ТАД, дзе на сцену по українски поставел представу „Лов на ловара”, чия премиєра була 23. октобра.
Ян Лазорик зоз Криванї у Шаришу ше упокоєл 30. авґуста того року.