КОЦУР – Од прешлого тижня у Коцуре тирва пописованє нєлеґално збудованих обєктох, на чим робя штернац комисиї. Як за Рутенпрес гварел руководитель Оддзелєня за инспекцийни роботи Општинскей управи Вербас Милош Роґанович, предмет попису лєм обєкти хтори нє маю будовательну дозволу, док обєкти хторим хиби дозвола за хаснованє нє предмет попису.
– Комисиї оконча попис и тоти поєдинєчни лїстини прешлїдза будовательней инспекциї, на основи чого вона принєше ришеня о валяню тих обєктох, алє най то нє застара людзох, бо у ришеньох будзе писац и же ше обєкт нє будзе валяц покля ше нє закончи процес озаконєня. Оддзелєнє за урбанизем будзе контактовац власнїкох, поведза яка документация потребна и вец ше окончи озаконєнє – гварел Роґанович.
Роґанович визначує же леґализованє релативно тунє и же нє годно селективно озаконїц обєкти, алє шицки одразу. Совитує Коцурцом най комисийом дошлєбодза пописац обєкти, цо у складзе зоз Законом о озаконєню обєктох.