НОВИ САД – На всоботу, 9. мая отриманей Медзинародней вистави макетох „Дунай 1255”, у рамикох хторей було и змаганє и оценьованє макетох, Лука Вуячич з Нового Саду, достал першу награду у катеґориї К2, за возрост до 14 роки. Лука, котри ходзи на виучованє руского язика и активни є у дзецинских секцийох РКЦ, златну медалю достал за макету оклопней превозки „БТР 80А”, тиж є наградзени и за макету „Аполо командни модул”, а виложел и макету танку „Тиґер 2”.
Медзинародна вистава макетох „Дунай 1255” отримана з нагоди Дня побиди над фашизмом у орґанизациї Макетарского клубу „Нови Сад – ИПМС” на Технолоґийним факултету у Новим Садзе. Участвовали макетаре з вецей местох зоз Сербиї, алє и з Велькей Британиї, Горватскей, а учашнїки зоз Словацкей госци Нового Саду були од штвартку.
Макетарски клуб „Нови Сад” основани 6. априла 2011. року, макетарство, як конар применєй уметносци, дакеди було окреме популарне, а тераз є дакус занягане на наших просторох, та спомнути Клуб з рижнима активносцами тот едукативни и интересантни гоби жада приблїжиц дзецом и одроснутим.
Дотераз поряднє участвовали на Манифестациї „Ноц музейох” у Новим Садзе, на рижних виставох и змаганьох у Сербиї, як и у Австриї, Мадярскей, Ческей, Словацкей, Белґиї и Велькей Британиї.