Матурантом керестурскей Штреднєй школи подзелєни дипломи

автор маф
1k Опатрене

РУСКИ КЕРЕСТУР – Матурантом Штреднєй школи „Петро Кузмяк”, з котрих 61 успишно положел матурски испит, вчера вечар шветочно уручени дипломи о законченим штредньошколским школованю.

Пригодна програма у Велькей сали Дому култури почала з традицийну латинску штредньошколску гимну „Ґаудеамус иґитур”, а директорка Школи Хелена Пашо Павлович з доберанима словами випровадзела матурантох, як поведзене – єдней з найуспишнєйших ґенерацийох трох оддзелєньох Школи – Ґимназиї з руским и сербским наставним язиком и напряму Туристични технїчар.

Пригодни слова своїм школяром висловели и оддзелєнски старшини Любка Малацко, Леона Сабо и Драґана Ґачеша, а потим, з вєдно 64-ох школярох, уручели 61 диплому – по седемнац у оддзелєньох Ґимназиї и трицец у напряме Туристични технїчар.

На програми уручене и припознанє за школяра ґенерациї, хторе того року достала школярка штвартого-два оддзелєня Ґимназиї (на сербским язику) Соня Кнежевич з Кули, котра ше поетски надихнуто одпитала од своєй школи и товаришох, та подзековала професором.

Матурантом уметнїцку програму пририхтали їх младши товарише, а матуранти напряму Туристични технїчар свою „класну” професорку нєсподзивали з торту за єй родзени дзень.

ПОВЯЗАНИ ТЕКСТИ