ПОЛЬСКА – Як пише портал lem.fm, штредньошколци у Польскей матурски испит и того року могли покладац на лемковским язику, за цо ше приявела єдна кандидатка – Дария Кузяк, котра матурски испит з лемковского язика успишно положела 24. мая у єдним з ґлоґовских лицейох на заходзе Польскей.
Як наводзи спомнути портал, того року Централна испитна комисия на час, без спозорйованя лемковских орґанизацийох, пририхтала и на своїм сайту обявела теми за покладанє матурского испиту и по лемковски.
Интересантне же як друга испитна тема за матурски испит з лемковского язика була понукнута поровнуюца анализа двох писньох и їх интерпретация – Штефаниї Трохановски: „Лєм нєбо над нами нашо” и нашого поету Янка Фейси: „О, людзе”.
Дария Кузяк вибрала першу понукнуту тему – анализовац проблем нєбешедованя на мацеринским, лемковским язику, на основи тексту Богдана Ґамбаля „Три поколєня (Премиков, центер Лемкох!)”, обявеним праве на спомнутим сайту lem.fm.
Попри з лемковского язика, Кузякова покладала и ширши испити з историї и польского язика, а тогорочну єдину кандидатку за покладанє матури з лемковского язика у тим потримовала нє лєм фамилия, алє и ширша лемковска заєднїца у Польскей. Сама Дария визначела же єй у пририхтованю матурского вельо помогла, учителька лемковского язика Варвара Дуц, и попри тим же є досц оддалєня од места єй штредньошколского школованя, бо жиє на Лемковини, алє єй посилала потребни кнїжки, материяли и совити.
Дария Кузяк грає и на гушлї и саксофонє. Ходзела до музичней школи, а була активна и у лемковскей заєднїци, понеже грала и у Лемковским ансамблу писнї и танцу „Кичера” з Леґници. Планує ше уписац на Музичну академию у Вроцлаве, алє нє виключела же у будучносци будзе студирац и лемковски язик на универзитетским уровню.