Файта животинї: Мачки.

Як мено твоїм любимцом? Хто им вибрал мена?

Мам мачку и кандура. Мачки мено Кити, а кандурови Пуфна. Я им виберала мена.

Кельо маю роки?

Кити ма штири роки, а Пуфна два роки.

Як вони випатраю? Можеш их описац?

Кити билей и помаранчецовей фарби, шумна є у твари и мегка, а Пуфна помаранчецови и ма по себе цмейши и блядши смуги, шерсц му мегка. Пуфна вон Китийов син, алє є вельо векши од нєй.

Цо твойо любимци найволя робиц?

Любя ше бавиц. Вше приду кед их поволаме, бо знаю же их порозмазуємє, або же достаню єсц. Любя спац и меркую на обисце. Барз любя ловиц миши, ящурки и птици.

Зоз чим их кармиш?

Зоз ґранулами, зоз йоґуртом и млєком, а любя єсц и меса.

Як ше ти зоз нїма бавиш?

Поволам их най приду, та их гласкам, або им заквачим цверну на палїчку же би ю оганяли, або бешедуєм зоз нїма док скакам на трамполини.

Можеш нам виприповедац даяку шмишну ситуацию зоз нїма?

Кед сом була мала, Кити ме чувала док сом ше бавела у дзецинским парку. Кед бим ше випендрала високо, вона мявчала док сом нє зишла долу. Обидвойо ме провадзели до оводи и тераз до школи, и дочековали ме при дзверох кед сом од дакаль приходзела. Пуфна лапа миши и ящурки, и приноши нам. Раз живу ящурку пущел пайташови до патики.

Чи би ши препоручела и другим дзецом же би себе набавели таких любимцох и прецо?

Гей, препоручела бим им, бо су забавни и же би ше мали зоз ким бавиц.

Маш дома ище даяки животинї?

Затераз нє мам.