НОВИ САД – У Новим Садзе стреду, 25. марца, отворени перши Форум младих лидерох реґиону, хтори будзе закончени на ютре, 28. марца. Штиродньова конференция позберала коло 200 студентох и представнїкох политики, дипломатиї, медийох, економиї и цивилного сектору зоз Сербиї и реґиону.
На отвераню Форуму министер нукашнїх дїлох Небойша Стефанович гварел же треба робиц на злєпшаню комуникациї и сотруднїцтва медзи младима, бо вони єдного дня буду приношиц одлуки, як и же Сербия вельо зробела на европскей драги и же важну улогу у тим процесу мали и буду мац праве млади.
– Наш задаток реформовац Сербию у складу з вредносцами ЕУ, жадаме прилапиц и превжац даєдни правила хтори владаю у ЕУ, алє жадами и затримац даєдни нашо окремносци – гварел Стефанович, наглашуюци же млади людзе буду мац важну улогу у Сербиї, як и же Влада роби шицко на обезпечованю вецей роботних местох и нагодох же би млади людзе применєли знаня хтори здобували у жеми и иножемстве.
Форум орґанизує новосадска Канцелария Европского руху у Сербиї, пре доприношенє реґионалному сотруднїцтву на просторе заходного Балкану и творенє предусловийох за будуце заєднїцке сотруднїцтво младих зоз Сербиї, Горватскей, Босни и Герцеґовини, Чарней Гори, Македониї и Албаниї на прейґгранїчних и медзинародних проєктох.
Конференция ма три главни теми: Реґионалне сотруднїцтво и процес европских интеґрацийох, Култура и явне информованє и Економия будучносци, а у рамикох темох ше отримує 24 активносци на панел-дискусийох, роботньох и округлих столох.