БЕОҐРАД – У Сербиї ище вше вельки процент дискриминациї, а кажда пията жалба на дискриминацию на основи националней и етнїчней припадносци, гварела Поверенїца за защиту ровноправносци Бранкица Янкович на того тижня отриманей конференциї „Най ровноправносц постанє стварносц”. З тей нагоди наглашела же у твореню модерного, толерантного и отвореного дружтва вельку улогу маю млади.
Поверенїца гварела же у проєкту „Най ровноправносц постанє стварносц” участвовали млади з цалей Сербиї и совити националних меншинох, хтори допринєсли же би розличносц була прилапена як потенциял и богатство дружтва.
Директорка Беоґрадского центру за людски права и представителька „Хижи людских правох и демократиї” Весна Петрович заключела же у Сербиї постоя добри законски ришеня, алє проблем же у каждодньовим живоце людзе чежко препознаваю дискриминацию. Прето значне же би млади научели препознац тото зявенє и промововали толеранцию.