МИКЛОШЕВЦИ – Вечарша програма першого дня тогорочней Културней манифестациї „Миклошевци 2015”, всоботу, 29. авґуста, була пошвецена миклошевскому композиторови Юлиянови Бучкови, з нагоди виходзеня нотней кнїжки його авторских композицийох з назву „Лєм писня будзе далєй жиц”.
Виведзени штернац з трицец композицийох за старших и за дзеци, кельо обявени у кнїжки, у хторей и биоґрафски податки о Юлинови Бучкови. Народзени є 1958. року у Миклошевцох, робел як наставнїк музики у Музичней школи при Културним центре у Вуковаре, а по войни як музични редактор у Радио Вуковаре. Умар 2011. року.
Бучково авторски композициї виводзени и наградзовани на наших музичних фестивалох и єден є з найзначнєйших композиторох и музичарох при Руснацох у новшим чаше, насампредз у Горватскей.
Нотни материял за кнїжку „Лєм писня будзе далєй жиц” позберали и обробели Юлиян Рамач Чамо, Лидия Пашо и Ана Бучко. Рамики за кнїжку подобово оформел Боґдан Ерделї, а єй видаванє помогли Координация рускей националней меншини Републики Горватскей и Представитель рускей националней меншини Городу Заґреб мр Ириней Мудри.
Бучково композициї на концерту шпивали и його дзеци – Гелена, Ана и Борис Бучково, та Михал Голик, Леся Мудри, Ивона Гнатко, Нада Батакович и Женска шпивацка ґрупа з Миклошевцох. Дзецински шпиванки, як трио и солисти, шпивали Миа Бучко и Клара и Кристиян Миклошово, а шпивачох провадзел орхестер Дому култури з Руского Керестура и Гелена Бучко на клавире.
Пред концертом, Културна манифестация „Миклошевци 2015” почала з отвераньом вистави трох младих подобових уметнїкох – Кристияна Медєша, Лариси Гнатко и Роберта Ерделя з Петровцох, котри виложели свойо роботи на розлични теми и у вецей технїкох.
