КУЛА – У кулскей Основней школи „Петефи бриґада” 11. юния отримана школска манифестация „Школи хтори ше любя”, за школярох и їх наставнїкох котри посцигли замерковани резултати на окружних и висших ранґох змаганя.
То уж традицийна шветочносц, як промоция творительства, на хторей директорка Школи Ержебет Блашко каждому школярови котри посцигнул замерковани резултати додзелює кнїжки, а наставнїком пенєжни награди.
Того року медзи наградзенима и школяре котри уча руски язик як виборни предмет – Анастасия Джуджар (5. класа) и Анастазия Козар (6. класа), котри завжали 2. место на Медзиокружним змаганю з руского язика, як и Сара Мармила (7. класа), котра завжала 1. место на Медзиокружним и Републичним змаганю з руского язика, а ма награди и з других предметох. За змаганя их пририхтовала Мария Стрибер.
На шветочносци участвовали и школяре з Музичней школи, а на концу за шицких учашнїкох бул пририхтани коктел.