Наполнєли ше 25 роки як основана Русинска оброда Словацкей

автор зам
741 Опатрене

ПРЯШОВ/РУСКИ КЕРЕСТУР – Стреду, 25. марца було 25 роки як на тот датум 1990. року основана Русинска оброда Словацкей, перша русинска орґанизация у тей жеми после демократских пременкох 1989. року у тедишнєй Чехословацкей.

Русинска оброда (РО) основана у Медзилабороцох, а єй перши предсидатель бул др Михал Турок Гетеш. На сновательней Скупштини РО присуствовали вецей як 100 представителє велїх инициятивних ґрупох з општинох Бардейов, Братислава, Гумене, Медзилаборци, Пряшов, Прага и Свиднїк.

З нагоди 25-рочнїци роботи РО, предсидатель Рускей матки Сербиї и Шветовей ради Руснацох/Русинох/Лемкох Дюра Папуґа терашньому предсидательови РО, инж. Миланови Мнягончакови упутел винчованку, у хторей, медзи иншим, поведзене:

– И нєшка треба наглашиц же найвекши заслуги за снованє РО мали Русини з Медзилаборцох, котри уж теди мали розвите сотруднїцтво з Руснацами у Руским Керестуре, у Войводини, як и з Русинами и Лемками з Польскей, Ческей, Мадярскей, з Подкарпатя у України, як и з карпатскима Русинами зоз ЗАД и Канади. И Перши Шветови конґрес Русинох отримани у Медзилаборцох, 22. и 23. марца 1991. року, кеди започала заєднїцка робота и активносц русинских орґанизацийох з осем державох штреднєй Европи и зоз Сиверней Америки – гвари ше у винчованки Дюру Папуґу.

РО и нєшка найвекша русинска орґанизация у Словацкей, а орґанизация, єй члени и чолнїки єдни з найзаслужнєйших за обнову, пестованє и розвой русинского националного идентитету у нєшкайшей Словацкей Републики.

ПОВЯЗАНИ ТЕКСТИ