ПЕРЕЧИН (УКРАЇНА) – На поволанку побратименого городу Перечин з України, прешлого викенду, 28. и 29. мая, представителє Месней заєднїци (МЗ) Руски Керестур присуствовали на Дньох Перечину, дзе участвовали у спортских змаганьох, як и на сайме привреди и ремеселнїцтва.
У делеґациї Керестурцох були предсидатель Совиту МЗ Владимир Олеяр, привреднїк Елемир Рац Мико и одбойкашска екипа, а з тей нагоди госци Перечину були и делеґациї местох з Польскей, Словацкей и Мадярскей.
Одбойкашска екипа, у хторей були Янко Хома мл., Марян Ковачевич, Деян Надь, Деян Чернок, Тарас Воротняк з Кули и спомнути Олеяр, участвовала у часци змаганьох у одбойки, дзе од домашнїх страцели з 3:2. Попри у одбойки, на Дньох Перечину були орґанизовани и змаганя у вельким и малим фодбалє, маратонє и одбойки на писку.
Делеґация Керестурцох присуствовала и на шветочней програми, Елемир Рац Мико и на сайме привреди, дзе викладал свою палєнку „Миковачу”, а домашнїм представел и айвар з керестурскей паприґи.
Як Рутенпрес дознава од Олеяра и Раца, делеґация од домашнїх була барз добре прията, ище раз потвердзене же представителє Перечину буду участвовац на турнире у одбойки у рамикох Спортских бавискох „Яша Баков” под час нашей „Червеней ружи”, а спомнути и финансовали драгу до України.