НОВИ САД – Од пондзелку, 11. юлия, на новосадским купалїщу „Штранд” тирва манифестация „Под корунами на Штранду”, на хторей ше промовує медиї на язикох националних меншинох‚ култура и язик меншинох‚ а того року змисти преширени и на спорт, здравство и кухарство.
По пияток ше одвива програма „Тидзень оптимизму”, та є од 18 до 20 годзин пошвецена спорту и промоциї вредносцох Олимпизму‚ як и значносци спорту у каждодньовим живоце.
Нащивителє того тижня можу видзиц наших олимпийцох з рижних дисциплинох, а праве нєшка, 14. юлия, у Библиотеки на Штранду на 18 г. госци буду атлетичаре Ивана Шпанович и наш дзешецбоєц Михаил Дудаш.
Од пондзелку, 18. юлия, почню єднотижньово язични роботнї у хторих ше дзеци од 5 до 12 роки упознаю з язиками меншинох котри жию у Войводини‚ медзи нїма и з руским.
Роботнї од пондзелку по пияток буду од 18 до 19, а всоботу од 18 до 20 годзин будзе орґанизовани квиз з наученого.
Перши тидзень почню роботнї мадярского язика, а од 25. по 30. юлий буду роботнї руского язика.
Потим шлїдза роботнї словенского, румунского и словацкого язика. За участвованє на язичних роботньох треба ше приявиц по фесйбук боку „Под крошњама на Штранду”‚ а тиж и на самим месце збуваня, у Библиотеки на Штранду.
Под час манифестациї Городска библиотека Нови Сад и того року орґанизує Библиотеку на Штранду з мотом „Библиотека там дзе и ви”, а їх хижка при кошаркашских теренох на Штранду.
Орґанизатор манифестиї „Под корунами на Штранду – медиї‚ уметносц и спорт” Городска библиотека Городу Нови Сад, Библиотека на Штранду‚ Центер за розвой меншинских и локалних медийох и Херор Медиа Понт.