ДЮРДЬОВ – На нєдзелю, 23. авґуста, у Дюрдьове будзе 13. Фестивал жридлового шпиваня „Най ше нє забудзе”.
На Фестивалє участвую шеснац шпивацки ґрупи, дзе у змагательней часци наступя тринац, а у ревиялней часци три ґрупи. Змагац ше буду дзивоцки, хлопски и мишани ґрупи з Руского Керестура, Коцура, Вербасу, Нового Саду, Суботици, Шиду, Нового Орахова, Кули, Бикичу, Дюрдьова, та з Миклошевцох, Петровцох и Винковцох з Горватскей. Кажда ґрупа будзе шпивац по три шпиванки – єдну а капела и два з провадзньом инструментох, без матрици, а наступ огранїчени на седем минути по ґрупи.
У ревиялей часци наступя Женска жридлова ґрупа домашнього КУД „Тарас Шевченко” и „Дюрдєвак”, тиж з Дюрдьова, як и Женска шпивацка ґрупа Руского културного центеру з Нового Саду.
Фестивал жридлового шпиваня „Най ше нє забудзе” на нєдзелю почнє на 16 годзин з отвераньом вистави з назву “Дакеди було…”, на хторей того року буду виложени предмети за тканє. Вистава будзе у Рускей школи.
На 17 годзин у дворе опрез будинку КУД „Тарас Шевченко” будзе отворена вистава „Стари ремесла”, на хторей свойо продукти пририхтани на стародавни способ виложа вецей ремеселнїки.
Шпивацка часц Фестивалу жридлового шпиваня „Най ше нє забудзе” на нєдзелю, 23. авґуста, почина на 20 годзин у дюрдьовским Доме култури.
Фестивал у Келандаре репрезентативних манифестацийох Националного совиту Руснацох, главни орґанизатор Фестивалу КУД „Тарас Шевченко” з Дюрдьова, а финансийно го потримую Покраїнски секретарият за образованє, предписаня, управу и национални меншини-заєднїци, Покраїнски секретарият за кулуру и явне информованє, Општина Жабель, Национални совит Руснацох и Завод за културу войводянских Руснацох.