БУДАПЕШТ/РУСКИ КЕРЕСТУР – На Сайме туризму у главним городзе Мадярскей, у Будапешту, 27. и 28. фебруара Руски Керестур як туристичну дестинацию представели предсидателька Здруженя женох „Байка” Славица Катона и членїца Здруженя Наталия Емейди.
Як дознава „Рутенпрес”, Руски Керестур вибрани участвовац на Сайме у рамикох Кластеру „Истар 21”, чий член и Туристичне здруженє (ТЗ) „Руски Керестур”.
Керестур бул заступени на штанду Покраїнского секретарияту за привреду Покраїнскей влади АП Войводини, вєдно з ище шейсц войводянскима валалами – Бачким Моноштором, Безданом, Чортановцами, Таванкутом и Кисачом.
Керестурски викладали промотивни материял ТЗ „Руски Керестур”, Здруженя женох „Байка” и Здруженя паприґарох „Капсикум анум”, дзепоєдни „Байково” виробки, а Кластер „Истар21” за шицки места пририхтал и промотивни материял їх туристичних понуканьох по мадярски.