РУСКИ КЕРЕСТУР – На соботу, 29. авґуста, у Руским Керестуре будзе отримана цалодньова роботна схадзка шицких одборох и представительох подручних канцеларийох Националного совиту (НС) Руснацох, на хтору поволани члени одборох за штири обласци над хторима национални совити маю компетенцию – за образованє, културу, информованє и службене хаснованє язика и писма, як и задлужени особи за спомнути обласци у подручних канцеларийох НС у наших местох.
Циль схадзки же би ше розпатрело актуални стан и проблеми у каждей обласци и предложело адекватни мири за їх розришованє. Резултат схадзки би мал буц акцийни план, у хторим буду назначени активносци хтори треба поробиц, ношителє каждей активносци, час за хтори их треба закончиц и рамикови финансийни план нєобходни за реализованє тих активносцох.
Роботна схадзка на соботу будзе отримана у шедзиску НС Руснацох у Руским Керестуре, у школским будинку Замок, а робота планована нараз, паралелно за обласци образованя, култури, информованя и службеного хаснованя язика и писма.
Приход и евидентованє учашнїкох од 9,30 до 10 годзин, кеди почнє робота по одборох и, з одредзенима павзами, тот широки заєднїцки сход членох одборох и подручних канцеларийох НС будзе тирвац до 16,30 годзин.
Плановане же приношенє заключеньох на одборох будзе од 12 до 13,30 г., а од 15 до 16,30 г. и заєднїцка дискусия.