ВИНКОВЦИ – Перше зашеданє Шветовей ради Русинох/Руснацох/Лемкох (ШР РРЛ) у новим зволаню од XV Шветового конґресу (ШК) РРЛ, будзе 28. септембра у Винковцох у Горватскей, а источашнє там будзе и зашеданє Комисиї за културу ШР. На зашеданю буду и предствителє Рускей матки зоз Сербиї.
На дньовом шоре ШР медзи седем точками будзе огляднуце на XV Шветови конґрес, отримани початком юлия того року у Словацкей, и о вецей точкох хтори вязани за одлуки ШК. Єдна з нїх и консолидация нарисох становискох Резолуциї XV Шветового конґресу, а будзе поднєшени и звит зоз зашеданя Комисиї за културу ШК.
После зашеданьох шицки члени тих целох буду присуствовац и на Културней манифестациї „Кед голубица лєцела” у Петровцох. У делеґациї Рускей матки на тоти подїї пойду предсидатель РМ и член ШР Дюра Папуґа, предсидателька Комисиї за културу Саня Тиркайло, член Комисиї за масмедиї Мария Дорошки и член Комисиї за просвиту Славко Пап.