На штварток музично-литературна програма младих и вистава фотоґрафийох

автор маз
983 Опатрене

НОВИ САД – У просторийох и у орґанизациї Заводу за културу войводянских Руснацох и младежского часопису МАК, на штварток, 10. децембра, будзе отримана Музично-литературна програма младих и вистава фотоґрафийох Даряна Гардия. У програми, хтора почнє  на 13 годзин буду участвовац млади музичаре и поетове котрим того и прешлого року вишол музични албум, лєбо кнїжка з часописом МАК, як и дзепоєдни з наймладших сотруднїкох МАК-у.

Златко Русковски, вєдно зоз Сашом Палєнкашом, Таниту Ходак, Саню Полдруги и Анамарию Колошняї, виведзе даскельо композициї з його нєдавно обявеного албуму „Лєм єден погляд”, а Полдругова, з провадзеньом Михаила Рамача на ґитари, и сама виведзе композицию з єй прешлорочного албуму „Поведз ми”.

2-Mladi-02

Цецилия Надь и Михаил Рамач буду читац поезию з їх двокнїжки „Чаривни нїтки/З молу до дуру”, а Михаил ше представи и з музику хтору компоновал на свойо стихи зоз спомнутей кнїжки.

Музични точки буду мац и млади музичарки и сотруднїци МАК-у Марина Роман и Кристина Афич з Руского Керестура.

На тей културней програми младих буду виложени и фотоґрафиї Даряна Гардия з його зборнїку фотоґрафийох „// / /”, хтори МАК прешлого тижня видал вєдно зоз Заводом за културу войводянских Руснацох.

ПОВЯЗАНИ ТЕКСТИ