НОВИ САД – НВУ „Руске слово” потримує свойо колеґинї и колеґох у Радио-телевизиї Войводини, у радию и телевизиї, и проциви ше їх одпущованю – наведзене у Сообщеню директора НВУ „Руске слово” др Бориса Варґи о наявених одпущованьох у РТВ.
„Одкази новинаром, окреме младим, нє лєм вдеренє по новинарскей професиї у Републики Сербиї, алє и директне загрожованє информованя на язикох националних заєднїцох у Войводини” – пише у сообщеню.
Директор НВУ „Руске слово” нагадує же єдна з основних причинох формованя вецейязичней Радио-телевизиї Войводини – потреба информованя националних заєднїцох. Тиж так, зоз одпущованьом новинарох и угрожованьом меншинскей програми, директно ше потупює медийни закони Републики Сербиї з котрима информованє на язикох националних заєднїцох явни интерес.
Варґа дума же „за новинарох и новинарки у Радио-телевизиї Войводини треба же би ше заложели їх предпоставени, новинарски здруженя, колеґове и орґанизациї за защиту людских правох”.