Медзи особами хтори пошли до Словацкей Републики и леґинь Никола Гарвильчак зоз Шиду. Нє кажде ше присподоби ґу новому способу роботи и дисциплини. И зоз Бикичу пошли три особи до Словацкей на роботу.
Як ше економска криза преглїбює, людзе глєдаю способ як заробиц динар и прежиц у чежких часох. У шидскей општини, нажаль, нєт инвеститорох хтори би отворели фабрики и заняли даскельо стотки нєзаняти особи. Пре таки обставини, остатнї мешаци вше вецей Шидянох и особи з околних валалох одходза до жемох Европскей униї же би там голєм дочасово, на даскельо мешаци заробели и так прежили дома.
ВШЕ ВЕЦЕЙ ОСОБИ ОДХОДЗА ДО ИНОЖЕМСТВА
Медзи такима особами и Никола Гарвильчак, 20-рочни леґинь зоз Шиду, по фаху шлосер, хтори после законченей штреднєй школи нє достал роботу у своїм фаху анї даяку другу роботу. Прето на початку октобра зоз ище двома пайташами ришел пойсц до Словацкей Републики же би там заробел.
– Никола робел у єдного приватнїка дзе умивал авта, потим у кафичох, алє плаца була мала, або єй анї нє було. Од обецункох и поволованя на сцерпенє нє мож жиц. Вєдно зоз пайташами одлучел пойсц до Словацкей и ми го у такей намири потримали – приповедаю його родичи оцец Ґоран, хтори тиж без роботи даскельо роки одкеди препадла Индустрия меса „Срим”, дзе робел 22 роки и мац Сладяна, хтора занята у єдней друкарнї у Шидзе и дзе плаца потераз порядна.
Їх син пошол робиц прейґ єдней поштреднїцкей аґенциї, хтора збера особи од 18 по 50 роки и потребно приложиц лєм потвердзенє од дохтора о здравственим стану. Гарвильчаково приповедаю же ше на роботу одходзи, практично як туриста, на три мешаци. Никола пошол до городу Трнава до єдней фабрики телевизорох. Його робота нє вимага окремни схопносци, алє досц напарто нєпреривно стац 10, або 11 годзини коло пантлїки и окончовац єдну исту операцию. Паузи кратки и шицко преходзи у ефективней роботи. На годзину ше плаци 2,2 еври, роботу прейґ роботного часу ше окреме плаци, а тиж єст и такволани „бонуси” за гевтих роботнїкох за хторих шефове преценя же ше окреме трудза и посцигую лєпши резултати од других.
– Вони там маю змесценє и костиранє як и транспорт по роботне место. Роби ше и соботами, а нєдзеля дзень за одпочивок. Обавала сом ше як ше Никола там знайдзе, з оглядом же го рано кед бул дома, нє було лєгко зобудзиц. Медзитим, озда пре вельку одвичательносц и же є там нє сам, вон ше швидко присподобел ґу новим обовязком. Знам же му там нє лєгко, алє анї дома нє було добре кед нє мал дзе заробиц, а пенєжи треба – ґвари Сладяна Гарвильчак.
ЗА РОБОТУ ЗАИНТЕРЕСОВАНИ И МЛАДШИ И СТАРШИ
Вона обчекує же єй син придзе пред Крачуном по грегориянским календаре, а вец после Нового року би ше мал врациц назад. Гарвильчаково нам гваря и же першобутно було плановане же би з Николом на роботу до Словацкей пошол и оцец Ґоран, медзитим, вон нашол роботу у єдного приватнїка хтори вирабя кухньови мебель. Ту робел мешац, плаца досц мала, робота прейґ роботного часу плацена символично, так же на концу Ґоран одустал од тей роботи.
– Кед ше Никола враци концом децембра, увидзиме цо и як далєй. Чи годзен од Нового року ознова пойсц, мушиме ше поинформовац як ше точно рахує три мешаци пребуваня там, и чи на тото вплївує пауза и прерва роботи. З оглядом на тото же то будзе штредок жими и же ту „мертва сезона”, и нє можем заробиц на наднїци, будзем патриц же би и я пошол зоз нїм до Словацкей на роботу – приповеда о дальших планох Ґоран Гарвильчак.
За роботу у Словацкей, як нєурядово дознаваме, єст зацикавених и у Бикичу. Углавним слово о младших особох. Деян Бобаль, предсидатель Совиту Месней заєднїци, нам потвердзел же до иножемства пошли два дзивки и єден леґинь хтори там роби як месар и у тим фаху добра и дньовнїца. На питанє же чи правда же ше приявели за одход вецей як 20 особи у тим сримским валалє, нє достали зме одвит.
З оглядом на тото же вше векша нєзанятосц и же ше нє отвера нови роботни места, велї надумали пойсц до державох Европскей униї заробиц за живот. Голєм на три мешаци, вец то помали трошиц дома, а вец ознова до иножемства…
НА БИРОУ НЄ МАЮ ПОДАТКИ
На евиденциї Националней служби за обезпечованє роботи у Шидзе коло 3 500 нєзаняти особи. Опитали зме ше чи маю информациї о дочасовим одходу нєзанятих до иножемства, Влайко Манойлович, координатор НСЗ нам гварел же вони нє маю урядову евиденцию таких особох, алє же му познате же людзе одходза дочасово пре роботу прейґ рижних аґенцийох як поштреднїкох.
