НОВИ САД – Нови Сад стреду, 17. новембра, преглашени за Младежску престолнїцу Европи 2019. року, лєм после мешац як є преглашени за Европску престолнїцу култури 2021. року.
Одлука о преглашеню за Младежску престолнїцу принєшена у Варни, у Болгарскей, дзе новосадска делеґация мала финалне представянє проєкту „Нови Сад отвера дзвери” (ОПЕНС). У финалу були пейц городи, попри Нового Саду и Амиенс з Французкей, Манґестер з Анґлиї, Перудя з Италиї и Дери Сити и Стрейбен зоз Сиверней Ирскей.
Як з тей нагоди гварел член Городскей ради за спорт и младеж Оґнєн Цвєтичанин, котри присуствовал на преглашеню, доставанє тей титули барз значне як за Нови Сад, так и за цалу Сербию и же Город предлужи укладац до витворйовьаня проєктох младих, бо то розвойна шанса за шицких гражданох.
– Указали зме же кед зме вєдно, можеме направиц лєпшу атмосферу и векши можлївосци за младих у Новим Садзе – гварел координатор Инициятиви ОПЕНС Вукашин Ґрозданович.
На доставаню титули повинчовал и городоначалнїк Нового Саду Милош Вучевич, котри визначел гордосц же ше младим з їх енерґию поспишело позиционовац Нови Сад високо на мапи Европи у обласци младежскей политики и подзековал шицким котри допринєсли же би город достал ище єдно европске припознанє.
Шицким младим Нового Саду, алє и цалей жеми и реґиону, на титули повинчовала и ЕЮИТ Фондация, хтора и иницировала и водзела кандидатуру Нового Саду за Младежску престолнїцу Европи, визначуюци же инициятиву предлужели младежски орґанизациї городу, односно тим ОПЕНС и принєсли ище єдну вельку побиду.