РУСКИ КЕРЕСТУР – Рукометаше Русина, всоботу 16. априла, у Спортскей гали у Руским Керестуре одбавели нєришено процив рукометашох зоз Зомбору з резултатом 30:30 (17:16).
През цале змаганє екипи ше зменьовали у водзеню, на два-три ґоли розлики, а у шорох Русина найлєпше на терену указали Филип Орос, Филип Тома и капитен Славко Гербут хтори нє мали векшу потримовку своїх бавячох.
Найвецей динамики на терену вислучовало ше у даскельо минутох пред сам конєц, кед екипа Русину пре виключенє остала без трох бавячох – Ороса, Югика и Тому. Же ше госцом заш лєм нє удало однєсц побиду, и попри тим же Русин остал лєм зоз трома бавячами, допринєсол и одлични ґолман Даниєл Милинкович хтори у 58. минути одбранєл пенал. Треба спомнуц же од штирох пеналох за Русин нє вихасновани анї єден, док госци од 5 пеналох вихасновали 3, а шицки у другей часци змаганя, цо на концу и уплївовало на резултат.
Русин наступел у составе – Даниєл Милинкович, Стойков Неманя, Иван Рац, Славко Гербут 7, Борис Югик 1, Владислав Салак 2, Филип Орос 10, Петар Пирожек, Виктор Микита, Филип Тома 9, Иґор Варґа 1.
У 11. колу рукометаше Русина госцую у Сивцу, дзе бавя змаганє процив ,,старого ривала,, дзе рукомет як и у Керестуре ма длугоку традицию.
