ПЕТРОВЦИ (РЕПУБЛИКА ГОРВАТСКА) – Централна манифестация култури Руснацох Републики Горватскей (РГ) „Петровски дзвон 2022”, 49. по шоре, почина нєшка у Петровцох, а будзе тирвац и ютре, 11. юния.
Нєшкайша програма почина на 19 годзини у Етноґрафскей збирки у Петровцох дзе будзе вистава фотоґрафийох Владимира Провчия, а на 19,30 почнє промоция трох кнїжкох. На 20 годзин плановани Литературно-музични вечар Руснацох з нагоди 100-рочнїци културней дїялносци у Миклошевцох и 10-рочнїци од шмерци Владимира Костелника. Того вечара у Петровцох концерт отрима Руски културни центер з Нового Саду, на котри наступи фолклорна секция, женска и хлопска шпивацка ґрупа и солисти.
Наютре, 11. юния, на 19,00 годзин будзе Смотра музичней и фолклорней творчосци „Петровски дзвон 2022”, дзе буду участвовац ансамбли Руснацох у РГ зоз Риєки, Заґребу, Винковцох, Райового Села, Осиєку, Вуковару, Петровцох, Миклошевцох, а наступя о госцуюци ансамбли.
Тогорочна 49. манифестация отрима ше под покровительством Совиту за национални меншини РГ, а зоз финансийну потримовку Општини Боґдановци.
