РУСКИ КЕРЕСТУР – Зоз Службу Божу на 19 годзин у Водици ше нєшка, 31. мая, означи нєзаповедане швето Царици Богородици и законченє Водицового тижня.
Року 1968. на Викариятскей корони священїкох ришене же би ше орґанизовало соборне паломнїцтво з нагоди швета Царици Богородици, понеже ше русадльово розбило пре календар. Того року настава перше паломнїцтво, кед ше 31. мая почали зберац нашо вирни зо Керестура, Коцура, Кули, Вербасу, Нового Саду, Дюрдьова и Сриму.
Вечарша Служба ше будзе преношиц и на фейсбук боку Катедрали. Предвидзене же би на тей Служби наказовал о. Янко Гербут зоз Канади, иншак родом з Руского Керестура.
Папа Франциск поволал шицких же би ше 31. мая на 18 годзин придружели молитви Ружанца котру будзе предводзиц у базилики Мариї Велькей – Маджоре. Так и вирни у нашей Водици котра побратимена зоз тоту базилику, вєдно з другима вирнима шестринских церквох на местох на котрих ше Мац Божа указала, буду ше модлїц вєдно зоз папом за мир.