БЕОҐРАД – По Предлогу закона о зопераню насилства у фамелиї, хтори пошвидко будзе пред посланїками у Скупштини Сербиї, насилнїкови у фамелиї нє будзе дошлєбодзене остац у обисцу – нє лєм кед насилство зробене, алє и кед єст опасносци же ше може случиц. З тим би ше до нашей правней системи уведло ткв. „нулту толеранцию на насилство”, преноша медиї.
Пракса указала же терашня система виновного права нєдостаточна за защиту жертвох и же ю треба дополнїц з окремнима одредбами хтори допринєшу защити жертвох насилства уж од нагадованя же би ше воно могло случиц, та по хвильку кед ше жертва годна окрипиц, а насилнїк зношиц одвичательносц за свойо справованє.
Зоз швидкима мирами ше зопре повторйованє насилного справованя, лєбо можлївосци же би ше збуло. Окрем тих превентивних мирох, нови акт одредзи и орґани и установи хтори би ше мали старац о защити жертвох насилства. Перша ґарадича у процесу защити будзе полицай обучени оценїц ризик и котри да основу за активованє дальших крочайох у защити и потримовки жертви, а о случайох насилства у фамелиї ше будзе водзиц евиденцию.
На вчерайшей конференциї Женскей парламентарней мрежи у Скупштини Сербиї предсидателька Скупштини Мая Ґойкович виявела же Предлог закона о зопераню насилства у фамелиї и вименки Виновного законїка, хтори предвидзую нови виновни дїла и оштрейши кари за насилство у фамелиї, буду розпатрани на идуцей схадзки Парламенту.
По податкох Покраїнского омбудсмана, интервенцию полициї пре насилство у фамелиї у Войводини глєдали коло 8 200 особи, а 80 одсто жертвох були жени.