НОВИ САД – Уметнїцка манифестация „Змайово дзецински бависка” у Новим Садзе почина на ютре, 3., а тирва 7. юний, и за тоти днї на рижних програмох буду участвовац вецей як 7 000 дзеци и 150 уметнїки. Манифестация будзе мац едукативни и забавни характер, заплановани велї фахово преподаваня, совитованя, презентациї и музични змисти.
Тогорочна 58. манифестация по шоре будзе под паролу „Цо вецей читаш – вше ши векши и моцнєйши”. Буду орґанизовани промоциї нових литературних виданьох за дзеци и младих, творчосци писательох, та мултимедиялни програми, науково и уметнїцки роботнї.
У музичних часцох буду участвовац рижни хори, дзецински и студентски оркестри, поп-рок ґрупи, а як наявене, на „Змайових дзецинских бавискох” на пияток наступи и дзецинска фолклорна ґрупа Руского културного центру з Нового Саду.
Уход на шицки змисти „Змайових дзецинских бавискох” безплатни.