ШИД – У церкви Преображеня Господнього у Шидзе вчера штири церкви – Словацка Еванґелистична АВ церква, Еванґелистично-методистична, Баптистична церква и Грекокатолїцка, односно нашо парохиї зоз Шиду и Беркасова, означели Шветови молитвови дзень.
Виривки з молитви, хтору того року порихтали жени з Багамских островох, читали по два жени з каждей церкви.
О. Владимир Еделински Миколка, парох у Беркасове, пречитал виривок зоз Святого писма о тим як Исус умивал ноги своїм ученїком-апостолом, а о. Михайло Режак, парох у Шидзе, наказовал о тей подїї и єй значносци и порученю у християнским живоце нєшка.
Окрем молитвох на сербским язику, хтори були виписани на видео-биме, єдна часц була на старославянским, а молитвена часц закончена з духовну писню „О Мариє Мати Божа”.
После молитвеней часци, вирни предлужели друженє у просторийох Лєтнєй владическей резиденциї.
