ВИРАВА/СНЇНА (СЛОВАЦКА) – У месце Вирава у Словацкей, на соботу, 15. октобра будзе семинар з нагоди 150-рочнїци народзеня педаґоґа, фолклористи и новинара Михайла Врабеля, а ютредзень, 16. октобра, у Снїни Фестивал духовней писнї.
На семинаре з нагоди 150-рочнїци народзеня Врабеля, автора и позбераних народних писньох „Руски соловей”, зоз своїма сообщенями участвую Дюра Латяк и Микола М. Цап. У рамикох означованя ювилею будзе и панахида у месней грекокатолїцкей церкви, та Шветочна академия у реконструованим Културним доме у Вирави, хтори з тей нагоди будзе и отворени. Програму орґанизую Союз Русинох-Українцох Словацкей, место Вирава и домашнї Дом култури.
Союз Русинох-Українцох Словацкей, вєдно з местом Снїна и Месним културно-просвитним центром у Снїни, орґанизатор 24. Фестивалу духовней писнї, хтори будзе на нєдзелю, 16. октобра.
На Фестивалє у Снїни з нашей жеми того року участвує Хор „Гармония” з Нового Саду, а одход на обидва збуваня орґанизує Союз Руснацох Українцох Сербиї, чия делеґация, на чолє з предсидательом Союзу Боґданом Виславскийом, будзе присуствовац на програмох у Вирави и Снїни.
