РУСКИ КЕРЕСТУР – Означованє 25-рочнїци снованя Рускей матки (РМ) будзе 20. децембра у Руским Керестуре, одлучене на вчерайшей схадзки Управного одбору (УО) Рускей матки. РМ основана 28. децембра 1990. року.
На схадзки, хтору водзел предсидатель Матки Дюра Папуґа, прилапене предкладанє програми означованя рочнїци, а члени УО поиформовани и о ґенези глєданя средствох за тоту нагоду од Националного совиту Руснацох и Заводу за културу войводянских Руснацох. Вимоги послати ище у януаре, а з тих институцийох суґероване же би ше вимогу за средства послало до локалней самоуправи Кула, а вони ше, як поведзене, зоз своїм авторитетом заложа за їх доставанє. Медзитим, гоч є послата, на вимогу од локалней самоуправи ище нє достати нїяки одвит.
Ґу тому, вимогу за доставанє средствох за означованє ювилею з першобутних 250 500, РМ зменшала на 195 000 динари.
На схадзки бешедоване и о пририхтованю штвартого тогорочного числа глашнїка РМ „Руснак”, хтори би мал висц з нагоди означованя рочнїци, а по схадзки у Канцелариї Матки отримана и презентация 20. числа „Руснака” и сатиричней сказки Мирослава Силадя „Руски цар”, хтора вишла як додаток тому числу.
Попри членох УО, на презентациї присуствовали и госци и дзепоєдни авторе обявених текстох, а о глашнїку и додатку спред Редакцийного одбору бешедовали Дюра Папуґа и др Михайло Фейса.