РУСКИ КЕРЕСТУР – Управни одбор Рускей матки пияток, 25. септембра одлучел же би ше до Вивершного одбору (ВО НС) Националного совиту Руснацох и до Заводу за културу войводянских Руснацох (ВР) ознова послало, тераз ревидировани, вимоги за софинансованє означованя 25-рочнїци снованя РМ, дознава Рутенпрес од предсидателя Матки Дюру Папуґу.
Перши вимоги за софинансованє рочнїци до спомнутих целох послати початком того рока, а як и других хтори означую ювилеї, ВО НС упутел же би ше за софинансованє обрацели до своїх локалних самоуправох, цо РМ и зробела. Медзитим, до нєшка з Општини Кула нє достати нїяки одвит, так же РМ и ВО НС и Заводу за културу ВР ознова пошлє вимоги за софинансованє Програми шветочного означованя и преслави 25-рочнїци снованя Рускей матки. Терашна вимога зведзена на 195 000 динари.
На пиятковей схадзки УО потримал сотруднїцтво РМ з Матицу бунєвску, Матицу словацку и Матицу сербску, у тим напряме буду превжати одредзени крочаї, а представителє РМ 24. и 25. новембра буду участвовац на Медзинародним семинаре з тему „Язики хторим грожи опасносц од нєставаня и диґитализованє едукативного материялу за образованє меншинох”, хтори орґанизує Матица бунєвска у Суботици.
На схадзки порадзене же промоциї глашнїка РМ „Руснак” у октобру и новембру буду отримани у Руским Керестуре, Кули и Коцуре, а познєйше вироятно и у других шедзискох одборох Матки. Як поведзене на схадзки, треце число спомнутого глашнїка видзе штредком октобра, а штварте по 20. децембер того року.