КУЛА – Скупштина општини (СО) Кула вчера прилапела Ревизию Стратеґиї отримуюцого розвою од 2014. по 2020. рок, хтора виробена на основи Статеґиї з 2008. року и як гварел директор Аґенциї за розвой Општини Кула Никола Жежель, будзе ше провадзиц єй витворйованє, алє ше ю будзе и дополньовац.
На Ревизиї Стратеґиї отримуюцого розвою робели 10 роботни ґрупи коло 20 мешаци, облапела шицки обласци розвою и шицки општински места, а часц є „Войводянского стандраду”, Покраїнского секретарияту за медзиреґионалнє сотруднїцтво и локалну самоуправу, хтори Општина Кула сполнєла.
Одборнїки СО Кула вчера прилапели и Одлуку же би кулска општина приступела до Асоцияциї европских городох и општинох за промоцию и реализацию политики рационалного хаснованя енерґиї на локалним уровню „Енерджи систис”, дзе партнере орґанизациї и места зоз Шведскей, а ма потримовку и Стаємней конференциї городох и општинох Сербиї. З нашей жеми у Асоцияциї ище лєм Ниш, Чачак и Варварин.
Прилапени и вименки дзепоєдних членох у надпатраюцих и управних одборох у даскелїх явних подприємствох, односно установох и школских одборох хторим Општина снователь, а место покойного члена Совиту за медзинационални одношеня Општини Кула Зорана Вуковича, як представитель сербского народу у тим целу будзе Желько Кежич.
Понеже одборнїца у локалним парламенту Мария Шепински з Руского Керестура (СНС) дала задзекованє на членство у двох комисийох СО Кула, до Комисиї за статутарни питаня, орґанизацию и нормативни акти вибрана Таня Квасни, а до Комисиї за дружтвени дїялносци Бояна Девич. З членства у тей комисиї розришени и Перо Ерґарац, а вибрани Боян Мишич.
На вчерайшей схадзки присуствовали лєм тройо одборнїки з опозициї, а и на тим зашеданю одборнїк Єдинственей Сербиї (ЄС) Драґутин Медоєвич мал предлоги за дополнєнє дньового шору – же би СО розправяла „о богаценю општинских функционерох пре злохаснованє положеня” и о „даваню роботи у општини и явних подприємствох по фамелийних вязох”.
Понеже Медоєвич о дополнєньох, дзе поставял и 24 питаня предсидательови Општини, бешедовал вецей як з Дїловнком предвидзени 10 минути, перше му виключени микрофон, а кед нє сцел напущиц бешеднїцу, ушладзела кратка павза. Одборнїки ЄС напущели схадзку, а СО Кула нє прилапела предкладаня дополнєньох дньового шору.
