РУСКИ КЕРЕСТУР – Вчера у просторийох Националного совиту (НС) Руснацох у Руским Керестуре у Замку отримана перша порядна схадзка Одбору за образованє после його конституованя у новим зволаню. Схадзку водзела предсидателька Одбору Мелания Римар, а попри векшини членох, присуствовали и предсидатель Вивершного одбору НС Желько Ковач и секретар Совиту Таня Арва Планчак.
Члени Одбору за образованє НС поинформовани о найважнєйших активносцох медзи двома схадзками у хторих на даяки способ участвовал и Одбор, лєбо його члени. Так, бешедоване о 4. Стретнуцу дзецох з руских дзецинских заградкох, о активносцох у Коцуре на уписованю до руского оддзелєня ОШ, о промоциї рускей Ґимназиї, о орґанизованей нащиви дзецох з наших местох на представох на Драмским мемориялє Петра Ризнича Дядї, о Стретнуцу руских школох и другим.
Єдна з точкох дньового шору була и информованє членох Одбору о пририхтованьох за тогорочну Лєтню школу, хтора будзе отримана и як екскурзия у Словацкей, од 20. по 27. юлий, а за хтору приявени школяре з вецей наших местох.
Бешедуюци о Семинаре за просвитних роботнїкох, на схадзки Одбору предложене же би ше до отримованя будуцих семинарох уключел и Одсек за русинистику и акредитовал теми специфични за просвитних роботнїкох котри наставу тримаю по руски.
Розпатрани и даскельо вимоги хтори сцигли до одбору, а бешедоване и о других чечуцих проблемох з хторима ше стретаю нашо просвитни роботнїки, та предкладаньох за їх ришенє.